你要知：即食麵太腍？湯粉幾時落？茶檔師傅親揭煮麵秘技

即食麵一定頹？半夜肚餓想食消夜，方便快捷的即食麵幾乎是首選，但為何試盡所有方法，都煮不出茶記水準？不是麵質太腍，就是不夠「香噴噴」，今次就請來在粉嶺經營人氣茶檔，日煮400碗即食麵的老闆張紀興掀開即食麵零失手秘技！

凍水落麵？滾水落麵？

網絡上流傳凍水落麵會麵質變腍，影響口感，張老闆認為凍水與滾水落麵分別不大，關鍵在觀察，「凍水落要多啲留意個麵嘅受水程度，煮開咗滾多滾就食得」他續指，自己一般都習慣滾水落麵，因為比較易於控制受水程度，水位恰好蓋過麵身，便為之「啱啱好」。煮麵期間見他不斷搖動小鍋，「呢個動作可以令滾水進入麵條之間，更快鬆開！」此舉有助整個麵餅平均受水，取代一般人用筷子弄散麵餅的動作，他笑言兩者效果相同，「不過(沒被弄散)個麵靚仔啲嘛！」

呢個時候落湯粉，可以幫個麵去除麵粉味？

參考某即食麵品牌官方網站，其建議食用方法是事先將湯粉倒進碗內，才將煮完麵的熱水倒進溶化湯粉，最後才加入麵條拌勻。惟張老闆卻有自己一套方法，「我喺水滾就放湯粉落鍋，拌勻後再放麵餅」。張認為先放湯粉可使麵條更入味，亦能蓋過即食麵自身的麵粉味。「很多人都唔鍾意陣麵粉味，所以要諗辦法去除佢！」除了先落湯粉，他更自創出一套獨門的「疏氣」大法。如之前所說在不斷搖動小鍋使麵平均受水後，需把鍋蓋蓋上，待蒸氣冒出，就需調細火力並掀起鍋蓋「疏氣」，讓麵粉味散去，重複以上動作約2至3次便可。

令麵條彈牙又不過「生」，放落碗都有技巧？

「喺屋企煮唔出咁彈牙，通常都過腍或過『生』！」食客李太指在家煮即食麵時，難以控制麵條的軟硬程度。經營茶檔20多年的張老闆笑言，「一切都係經驗之談！」他認為每個人的喜好不同，沒有標準的軟硬度。但要確保麵條不會「半生半熟」，他就有一個小貼士，「將即食麵浮在上方的麵朝碗底放，咁就可以令整個麵餅都平均『索』到湯，唔會一半煮唔透，一半過腍！」另外，落麻油的時間亦關乎整個麵是否「香噴噴」，事關麻油受熱後香氣會流失，所以應在「落碗」後才加入，提升香味。

配菜愈簡單愈好食？雞蛋係必加之選？！

學會了獨門煮麵技巧，相信以後煮麵再難不到各位喇！惟光是即食麵未免「太寡」，食客許同學笑言對即食麵的配菜並不講究，「可能會加啲餸頭餸尾囉！」而張則認為，配料應以簡單為主，「最多人食就係餐蛋麵，簡單又好食！」當中蛋液混和麵條一同食用，更是絕配！