郭富城陪方媛返安徽探親 俾親戚捉住影相笑得極尷尬 網民話「好像被捕了」

唔少內地人都會回鄉過年，天王郭富城就同太太方媛喺農曆年期間，返去太太家鄉安徽探親度歲。有小紅書網民就聲稱喺當地拍到城城向外父一家拜年嘅情況。

從多條片段可見，以金髮all back造型示人嘅郭富城，喺一處相信係客廳嘅地方同親友拍照，難得天王係親戚大家梗係唔放過，有人仲捉實城城雙臂肉緊合照，但係熱情到城城有啲尷尬，甚至有網民留言話「這張郭天王好像被捕了一樣」。

另一條片段中，郭富城同太太方媛準備派利是，身旁穿插嘅小女孩相信就係佢地嘅囡囡詠希同詠萱。而比郭富城年長2歲嘅方媛爸爸都有現身，見到天王級女婿咁受鄉親歡迎，面子贏晒，外父大人梗係四萬咁口！

有自稱係方媛親戚網民話，郭富城婚後每年都陪老婆方媛返鄉下，令佢地有好多嘢可以掟上朋友圈。