兩師徒 ｜阿迪達自爆為備戰皇馬 曾向師父哥迪奧拿取經

阿仙奴主帥阿迪達（Mikel Arteta）透露，他在擊敗皇家馬德里一戰前，曾向曼城主帥哥迪奧拿（Pep Guardiola）請教。

雖然阿迪達執教經驗已有幾年，但今場卻是他首次以主帥身份在正式比賽中對陣皇馬。阿仙奴上一次面對皇馬，已是2006年，當時阿迪達甚至仍未加盟球會，更遑論擔任主帥。

相比之下，哥迪奧拿執教的曼城過去五年間與皇馬交手多達九次，包括今季二月的歐聯淘汰賽，儘管兩回合都輸波。

阿迪達表示，他早在首回合前，已經向這位昔日導師請教，「我由佢身上學咗好多，不論係職業上定私人層面，過去幾日我哋有傾過，因為我好想同佢講幾句。而我覺得佢都想搵我傾，因為佢對我哋發生嘅好事，都感到開心。」

「向最好、向有經驗嘅人學習，我覺得係聰明人會做嘅事。而我都好幸運，一直有唔少好人幫我。」

雖然阿迪達無講哥帥過左咩招數俾佢，但如果係提供實用建議，阿迪達明顯將之成功傳遞給球員們。因為阿仙奴在首回合踢出極高水準，以 3–0 擊潰皇馬。

有趣的是，呢場勝仗亦讓英超聯賽在歐洲賽事的積分達標，下季將獲得五個歐聯席位，對目前排第六的曼城來說無疑是利好消息。哥帥絕對算是一為神功，二為弟子。

目前曼城在英超積分榜排第六，踢多一場下仍落後身前的排第五的紐卡素一分。因此阿仙奴的這場勝仗，無疑替曼城爭取來季歐聯資格增添多一線希望。

作者：One Football