勇士巨星史提芬居里（Stephen Curry）素來射波超準，但最鋒利嘅刀都有失手嘅一日，咖喱有時上半場都會未有局，手感冰冷。

近日咖喱妹（Sydel Curry）及其老公Damion Lee做清談節目，大爆咖喱原來有個習慣，會喺比賽中場時間上社交平台X（前Twitter）主動搜尋酸民對自己嘅留言嚟激勵自己。

妹夫Damion Lee說：「史提芬會喺半場打自己個名，然後就見到啲留言話『Stephen Curry點點點』之類，佢會望一兩分鐘，掃一掃，再收起部手機，落場下一節就爆發。」

咖喱妹補充，後來甚至有啲人故意寫黑評嚟「餵火」居里。對居里而言，呢個策略效果唔錯。

事實上，居里係生涯之中，唔止一次喺上半場慢熱後下半場反撲。最經典例子係2019年西岸準決賽第六戰對火箭，佢上半場0分收場，但下半場狂轟33分，助勇士以118比113贏波晉級。

Damion Lee 當時雖然係勇士一員，但無參與季後賽，勇士最後總決賽不敵多倫多速龍。之後幾年 Damion Lee 角色漸重，最終喺2022年同居里一齊攞到總冠軍。