方便網購 + NFC 手機查餘額、交易紀錄！第一代八達通今日起可免費更換
對於香港人來講，八達通可以話得上係近年陪伴住我哋成長的電子貨幣。隨著進入網購年代，第一代八達通終於要宣佈退役。八達通公司今日就宣佈，會為 2003 年前申請及購買的個人八達通及非個人八達通，合共約 200 萬張提供免費更換服務，市民從今日起可以係 10 個港鐵服務站免費更換。
至於分辨手上八達通是否第一代十分簡單，八達通方面指第一代編號只有 8 位數字，並沒有括號數字，亦不能透過 NFC 讀取卡上的交易資料，更遑論進行網購付款。八達通公司更表示，今日會在炮台山、柯士甸、奧運、深水埗、樂富、太子、將軍澳、葵芳、大窩口及屯門站設立服務站，以換卡機為需要市民換卡，整個過程大約為 1 分鐘，而卡內資料，包括：門禁功能、自動增值服務、八達通日日賞計劃資料等均會轉移至新卡。不過要留意，如果你嘅八達通係個人八達通，就需要先上網登記申請過一張新卡，當收到新卡後就可以到服務站的換卡機過資料。
不過就算唔換卡，大家都唔洗太擔心，因為八達通方面都話舊卡並無時間表何時會停用，仍然可以用來進行基本付款功能，不過筆者覺得，作為 e 世代的我哋，換過張新嘅，淘寶買嘢或者用手機查餘額都方便得多啦！
