操盤手札記│特朗普打伊朗 「周處除三害」上身？（割柑人） 割柑人

剛過去嘅周末，以色列聯同美國空襲伊朗，美國總統特朗普喺自家社交媒體Truth Social發布影片，宣布展開「重大作戰行動」，話要「透過消除伊朗政權逼在眉睫的威脅來保衛美國人民」，強調「我們曾多次嘗試達成協議」，又呼籲伊朗人民「當我們行動結束後，你們接管政府」，美國戰爭部將行動命名為「史詩怒火」（Epic Fury）。伊朗隨即發射導彈還擊，射向以色列及位於科威特、阿聯酋、卡達、巴林嘅美軍基地。其後，伊朗最高領袖哈梅內伊喺官邸遇襲身亡，伊斯蘭革命衛隊宣布關閉霍爾木茲海峽。封鎖海峽，國際油價勢必飊升，中東局勢惡化，外溢擴散風險大增。

下載Yahoo財經APP

美股外幣即時報價 多國新聞任睇

1月郁委內瑞拉 2月郁伊朗

此前，美國同伊朗上周四就伊朗核計畫展開談判，但傾唔掂數，放風本周一埋枱再傾，點知未埋枱已反枱！上周五，市場見美國喺中東集結龐大戰艦戰機群，已覺勢色唔對，對開戰有戒心，但仍觀望本周談判。另一方面，美國通脹有升溫迹象，上周五出爐嘅1月PPI按年升2.9%、按月升0.5%，分別高過預期嘅2.6%、0.3%；核心PPI按年升3.6%、按月升0.8%，亦分別高過預期嘅3%、0.3%，兼係上年7月以嚟最高。利率期貨顯示，市場預期上半年減息機率跌至四成。喺打仗、通脹陰霾下，美股受壓，道指、標指、納指分別跌1.05%、0.43%、0.92%，追蹤美國上市中概股表現嘅金龍中國指數更跌1.81%。

今年以嚟，特朗普已對兩個被美國視為「邪惡軸心」嘅國家出手——1月頭郁委內瑞拉，2月尾郁伊朗，佢係咪周處上身？但「周處除三害」，殺虎斬蛟後就係「除」埋自己呢一「害」！姑勿論出兵伊朗會唔會有乜差錯影響特朗普頂烏紗，事實上，如果場仗速戰速決，而非陷入持久戰，對佢仕途冇壞；不過，已故淫媒富商Jeffrey Epstein嘅Epstein files令佢醜聞纏身、濫徵關稅被判違憲令佢面臨索償官司，都成為佢仕途上嘅污點。

睇返港股，上周日升日跌，周五中央政治局召開會議，提及要實施更加積極財政政策及適度寬鬆貨幣政策，受消息刺激，恒指扭轉周四跌勢，收升249點或0.95%，報26630。不過，受外圍拖跌，夜期低水166點；ADR比例指數低水168點。場外「黑期」周末更低水394點，報26236；周日低水幅度收窄至238點，報26392。美伊周末開戰，金融市場今日勢必波動，尤其股市，避險情緒料帶來沽壓，但外圍不靖，更要冷靜。人大政協兩會本周三、四開幕，或有應對政策出台。

封鎖霍爾木茲海峽 油價勢漲

美伊開戰，最壞情境出現，就係——霍爾木茲海峽受到封鎖。封峽勢必引致油價飆升，根據彭博模擬情境，一旦油價衝上每桶130美元（上周五紐約期油升2.78%至67.02美元，布蘭特期油升2.87%至72.87美元），美國CPI或會衝破3%（1月為2.4%）。霍爾木茲海峽被封，對中國亦甚為不利，該海峽係全球三分之一石油貿易必經航道，而中國係全球最大石油進口國，半數進口石油取道該海峽，封峽勢必危及中國以至全球石油供應鏈。此外，資金亦會流向黃金等避險資產，令中國股市等風險資產受壓。

割柑人

[心情排行榜]

【已經有0人表態】

感動

路過

高興

難過

搞笑

憤怒

無聊

同情

• [感動最多的] 2012年教育财政投入占GDP4％ 列财政支出首位 
• [路過最多的] 新加坡開放數位金融服務 馬雲也想搶杯羹 
• [高興最多的] 台湾18岁少女 32E胸围火速蹿红(组图) 
• [難過最多的] 指罔顧衞生 無視私隱 月租客斥5星酒店4宗罪 
• [搞笑最多的] 刘嘉玲恶斗张曼玉显疲惫 素颜现身太阳镜遮 
• [憤怒最多的] 章子怡惨被39岁老女人夺夫的五大原因 
• [無聊最多的] 元朗7.21事件八個月晚上有人堵路 警方放催 
• [同情最多的] 【學界羽毛球精英賽・專訪】青中：放下成敗